Archive pour la catégorie : Pressecommuniqués

No enttäuschend COP30: Jonk Sozialisten fuerderen eng Luxusstéier op Privatjette

Laut UNO stéiert d’Äerderwäermung op 2,8°C zou, wäit fort vum 1,5°C Zil wat virun zéng Joer zu Paräis op der COP decidéiert gouf. D’Resultater vun der COP30 sinn enttäuschend an änneren näischt dorunner dass d’Quantitéit vun Zerrenhausgasen kontinuéierlech an d’Luucht geet.

An dem Kontext ass et schwéier ze akzeptéieren dass an enger Klimakris d’Unzuel vun de Privatjetten déi vu Lëtzebuerg aus starte kontinuéierlech an d’Luucht ginn. Am Joer 2022 goufen hei am Land 2.767 Flich registréiert, e Plus vu 67 % par rapport zur 2021. Privatjet stousse laut enger Etude vu CE Delft 5 bis 14 Mol méi Emissioune pro Persoun aus wéi ee kommerzielle Fluch.

Wärenddem d’Bierger ëmmer reegelméisseg invitéiert ginn hiert d’Verhalen ze änneren an een Effort ze maache fir zur Klimatransitioun bäizedroen, mécht eng kleng Minoritéit vun iwwerräiche mat hirem ultraschiedlechen verhalen einfach virun.

No dem Echec vun der COP30 muss Lëtzebuerg ee staarkt Zeeche setzen.

Dofir fuerdere déi Jonk Sozialisten eng gestaffelt Luxusstéier vun 300€ bis 2000€ pro Passagéier vun engem Privatjet déi vu Lëtzebuerg aus starten. Donieft soll sech Lëtzebuerg op europäeschem an internationalem Niveau asetze fir eng koordinéiert Besteierung vu Privatjetten.

De Montant ass orientéiert un der franséischer Stéier op Privatjetten. Wat de Fligermodell méi ëmweltschiedlech ass, an d‘Distanz méi laang, wat de Montant vun der Stéier soll méi héich sinn. Dës Mesure soll sech net op Hobbyfliger/Sportsfliger applizéieren.

Esou eng Stéier kéint all Joers méi wéi 2,5 Milliounen Einnamen an d’Staatskeess bréngen a kéint zum Beispill Programmer déi de lokalen Tourismus ënnerstëtze finanzéieren oder an d’Entwécklungshëllef investéiert ginn. Weltwäit gëtt geschätzt dass esou eng Luxustéier  kéint all Joer 40 Milliarden Dollar eranbrengen. Donieft géif esou eng Stéier ee kloer Präissignal setze géint een ultraschiedlecht a privilegéiert Transportmëttel.

Dës Stéier ass ee kloert Zeechen: An enger Klimakris muss jidderee säi Verhalen änneren. Et geet net dass eng iwwerräich Minoritéit  einfach viru mëscht wéi wann näischt wier.

Eng Pensiounsreform op d‘Käschte vun de Jonken

Dat virun deem mir als Jonk Sozialisten an de läschte Wochen a Méint ëmmer erëm gewarnt hunn, ass genau esou agetrueden. Op eng komplett onsolidaresch Aart a Weis gëtt de Generatiounevertrag opgebrach. Leit déi kuerz virun oder schonn an der Pensioun si brauchen nëmmen näischt ze fäerten. Jonker, déi haut ufänke mat schaffen, wëssen awer säit gëschter: si musse méi laang schaffe goen an dat fir eng manner héich Pensioun.

Den Niewesaz, an deem de Premier seng Pläng op eng onverständlech Aart a Weis presentéiert huet, sinn Dynamit fir den Zesummenhalt an eiser Gesellschaft. Jonk Leit sinn alt erëm déi, déi zeréckstieche mussen, dat an engem Moment wou grad hir Zukunftsperspektiven esou onduerchsiichteg sinn ewéi dat nach bei wéinege Generatioune virdrun de Fall war.

Donieft ass déi erzwongen Erhéijung vum Pensiounsalter och sozial ongerecht. Si trëfft virun allem déi Leit, déi kierperlech ustrengend Aarbechte maachen an doduerch och eng manner héich Liewenserwaardung hunn. Dat ass brutal an inakzeptabel.

Déi 5 Jugendparteien (CSJ, Jonk Demokraten, déi Jonk Gréng, déi Jonk Lénk an d’ Jonk Sozialisten) haten uganks Mäerz kloer gestallt, dass mir zu 5 um Prinzip vun de 40 Annuitéite festhalen.

Als Jonk Sozialiste wäerte mir eis géint d’Pläng vun der Regierung wieren an halen eis et net vir eegen Aktiounen, elleng oder a Koordinatioun mat anere Jugendorganisatiounen, ze starten fir eis Onzefriddenheet iwwert d’Politik vun der CSV-DP Regierung ze weisen.